1. La nomo de la faka fervojista Esperanto-organizo estas "Internacia Fervojista Esperanto-Federacio" (IFEF). En tiu ĉi Statuto ĝi estas nomita "Federacio" aŭ "IFEF".
   
   [IFEF estis refondita la 4an de aŭgusto 1948 en Amsterdam (NL) sub la nomo "Internacia Federacio de Esperantistaj Fervojistoj", valida ĝis 1953, poste "Internacia Federacio Esperantista Fervojista", valida ĝis 1963. La unua fondiĝo de internacia fervojista Esperanto-organizo okazis la 7an de septembro 1909 en Barcelona (ES), sub la nomo "Internacia Asocio de la Esperantistoj Fervojistoj" (IAEF).]

La celoj de la Federacio estas:

1. disvastigi la uzadon de la internacia lingvo Esperanto inter fervojistoj, ĉe fervojistaj organizoj kaj fervojaj instancoj;
2. kontaktigi aktivajn kaj emeritajn fervojistojn, kiuj scipovas aŭ lernas Esperanton;
3. aranĝi internaciajn renkontiĝojn;
4. eldoni oficialan organon, fakan materialon kaj terminaron;
5. evoluigi la fervojfakan lingvon, gardi ĝian unuecon kaj zorgi pri ĝia ĝusta uzado;
6. kontribui al faka klerigo kaj ĝenerala kulturo de la membroj.

1. La Federacio estas faka kultura organizo, neŭtrala rilate al nacieco, raso, sekso, religio, politiko kaj sociaj problemoj, kun escepto de la lingva problemo en internaciaj rilatoj.
2. Respekto de la homaj rajtoj, difinitaj en la Universala Deklaracio de la Homaj Rajtoj, estas esenca elemento de la federacia agado.

1. IFEF estas "Aliĝinta faka asocio" de la "Universala Esperanto-Asocio" (UEA).
2. IFEF kunlaboras kun la "Internacia Fervojista Federacio por Kulturo kaj Libertempo" [Fédération Internationale des Sociétés Artistiques et Intellectuelles de Cheminots (FISAIC)].
3. IFEF laŭ konveneco kunlaboras kun aliaj Esperanto-organizoj aŭ subtenas ilin.

1. La administra jaro estas la kalendara jaro.
2. La organiza jaro komenciĝas tuj post la federacia kongreso.

La oficiala lingvo de IFEF estas la internacia lingvo Esperanto laŭ la difinoj en sia Fundamento, laŭ la verkaro de Zamenhof kaj laŭ la ĝenerala lingvouzo kontrolita de la Akademio de Esperanto.

Pri la agoj de siaj reprezentantoj IFEF respondecas nur en tia amplekso, ke tiuj agoj okazis laŭ la kompetentecoj, kiujn Statuto, Regularoj kaj kongresaj decidoj difinas por ĉiu funkcio.

La Federacio distingas jenajn membrojn:

1. asociaj membroj de la aliĝintaj landaj asocioj;
2. individuaj membroj el landoj, kie ne ekzistas landa asocio;
3. honoraj membroj, nomumitaj de la komitato pro siaj meritoj por la Federacio;
4. honoraj prezidantoj, nomumitaj de la komitato pro siaj meritoj por la Federacio.
5. membroj de la Honora Patrona Komitato.

Apogantoj estas personoj aŭ organizoj, kiuj subtenas morale kaj finance la celojn de la Federacio. Ili ne estas membroj laŭ § 8.

1. La membroj de landa fervojista Esperanto-asocio, laŭregule organizitaj, povas aliĝi al la Federacio, kondiĉe ke la asocia statuto ne kontraŭas la IFEF-Statuton.
2. El ĉiu lando (ŝtato) principe povas esti reprezentata nur unu landa asocio. Se pro naciaj cirkonstancoj ne eblas starigi tutŝtatan asocion, IFEF akceptas plurajn sekciojn el la tereno de la respektiva ŝtato. Pri la rajtoj je komitatanoj kaj voĉdonado validas la sumo de la sekciaj IFEF-membroj (§ 12). La sekcioj decidas inter si pri la personoj de komitatanoj.
3. La membreco de landa asocio efektiviĝas post la akcepto fare de la komitato kaj post la pago de la kotizoj.
4. Nur kiu loĝas en lando, kie ne ekzistas aliĝinta asocio, senpere aniĝas al IFEF kiel individua membro. La membrecon de individua membro ordigas kaj registras la kasisto.

1. La membreco finiĝas per morto, skriba eksiĝdeklaro aŭ eksigo.
2. Membro, kiu komunikas sian eksiĝdeklaron post la fino de administra jaro, devas pagi la kotizon ankaù, por la komenciĝinta jaro.
3. Membro estas eksigata pro:
   1. agado kontraŭ la celoj de IFEF;
   2. neplenumado de propraj devoj;
   3. endanĝerigo de la reputacio de IFEF aŭ de la Esperantomovado;
   4. nepago de IFEF-kotizo malgraŭ perletera urĝigo.

1. La komitato estas la decida organo de IFEF. Ĝi konsistas el komitatanoj, delegitaj de propraj landaj asocioj por ilin reprezenti.
2. Se necesas reprezenti apartan komisionon, la komitato povas alelekti kromkomitatanojn ĝis maksimume kvinono de la nombro de komitatanoj.
3. La gvidanto de la faka komisiono aŭtomate estas kromkomitatano.
4. La komitatanoj elektas inter si ĉefkomitatanon kaj anstataŭanton.

1. La komitato estas kompetenta pri:
   1. aprobo de la Statuto kaj Regularoj;
   2. direkto de la ĝenerala agado de la Federacio;
   3. aliĝo kaj eksigo de ĉiuspecaj membroj;
   4. elektoj de la estraro, ĉefkomitatano kaj anstataŭanto, kromkomitatanoj;
   5. decidoj por la agado de la estraro;
   6. starigo de komisionoj, konfirmo de ties respondeculoj kaj elekto de komisiitoj por specialaj taskoj;
   7. aprobo de la estraraj jarraportoj;
   8. aprobo de la budĝeto, fikso de la jarkotizo kaj ekzamenado de la financoj;
   9. nomumo de honoraj prezidantoj, honoraj membroj kaj membroj de la Honora Patrona Komitato;
      Atentigo: la sekvantaj literoj j, k, l kaj m respektive estas k, l, m kaj n en la "normala papera" versio, en kiu ne estas la litero "j".
   10. kunlaboro kun aliaj esperantistaj, kulturaj kaj sindikataj organizoj en la limoj de neŭtraleco;
   11. proponoj flanke de la membraro laŭ § 22;
   12. akcepto de proponoj prezentitaj post limtempo;
   13. lokoj kaj periodoj de la sekvontaj kongresoj.
2. Pri la interna organizado kaj disvolviĝo de landaj asocioj kaj pri ties rilatoj kun ŝtataj aŭ fervojaj instancoj la komitato povas esprimi nur rekomendojn.

1. La ĉefkomitatano:
   1. prizorgas la administrajn taskojn de la komitato; akceptas proponojn kaj submetas ilin al la komitato;
   2. ricevas demisiojn de estraranoj kaj gvidanto de la faka komisiono, konigas ilin al la landaj asocioj kaj komitatanoj kaj invitas prezenti kandidatojn;
   3. gvidas la Federacion ĝis la sekvonta komitatkunsido kaze de evidenta malfunkciado de la estraro.
2. La ĉefkomitatano kaj anstataŭanto konservas la reprezentantecon de siaj landoj kaj ne ĝuas apartajn rajtojn.

1. Landa asocio, landa sekcio aŭ komisiono rajtas skribe delegi por difinita komitatkunsido samrajtan anstataŭanton por komitatano aŭ kromkomitatano malhelpata partopreni en tiu kunsido.
2. Landa asocio, landa sekcio aŭ komisiono, kiu povas delegi nek komitatanon, nek anstataŭanton al komitatkunsido, rajtas skribe voĉdoni pri raportoj kaj publikigitaj proponoj, kaj, se ĝi mem faris proponojn por la kongresa tagordo, ĝi rajtas peti alian landan asocion aŭ la estraron defendi ilin.
3. Anstataŭigo por skriba voĉdonado ne eblas.

1. Komitatano aŭ kromkomitatano prezentas kaj defendas proponojn kaj decidojn de sia landa asocio, sekcio aŭ komisiono, tamen li estas persone respondeca pri siaj agoj kaj decidoj. Li devas plenumi la decidojn de la komitato, eĉ se li ne samopinias.
2. Kaze ke landa asocio, sekcio aŭ komisiono malaprobas la agadon de sia komitatano, ĝi povas forigi lin de la posteno antaŭ fino de oficperiodo, sed devas tuj anstataŭigi lin, kaj anonci tion al la ĉefkomitatano.

La estraro de la Federacio konsistas el prezidanto, vicprezidanto, sekretario, kasisto kaj redaktoro.

La estraranoj estas elektataj de la komitato.

1. La estraro respondecas al la komitato kaj devas fari ĉion utilan kaj eblan por la Federacio, nome precipe:
   1. plenumi la decidojn de la komitato;
   2. prezenti proponojn;
   3. prezenti agad- kaj kas-raportojn de la pasinta, kaj budĝeton por la sekvonta jaroj;
   4. respondeci pri la financoj;
   5. administri la propraĵon;
   6. aprobi kongresprogramon kaj kunlabori kun la loka kongresa komitato kaj la koncerna landa asocio;
   7. kunvoki la komitaton helpe de la ĉefkomitatano minimume du monatojn antaŭ kunsido kaj informi ĝin pri la tagordo kaj proponoj;
   8. eldoni la federacian organon;
   9. starigi kaj aktualigi laborplanon.

1. La prezidanto:
   1. reprezentas la Federacion;
   2. prezidas la estraron, komitaton kaj kongreson;
   3. subskribas la ĉefajn korespondaĵojn kaj dokumentojn;
   4. afergvidas la organizadon de la kongresoj;
   5. pro urĝaj kaj esceptaj kazoj rajtas agi anstataŭante estraron kaj komitaton, sed havigu al si la konsenton de la komitato kiel eble plej baldaŭ.
2. La vicprezidanto:
   1. anstataŭas la prezidanton, laŭnecese;
   2. kolektas la jarraportojn de la landaj asocioj kaj verkas ties resumon por plenkunsido kaj IFEF-organo;
   3. transprenas specialajn taskojn laŭ interkonsento kun la prezidanto.
3. La sekretario:
   1. administras la Federacion;
   2. memstare plenumas malpli gravajn korespondaojn, sciigante ilian enhavon, originale aŭ kopie, al la prezidanto;
   3. respondecas pri la plenumo de la kurantaj laboroj kaj certigas la ligon kun internaciaj organizoj kaj fervojaj instancoj;
   4. interkonsente kun la prezidanto kaj ĉefkomitatano fiksas la tagordon de la komitatkunsidoj kaj prizorgas ties protokoladon;
   5. plenumas la decidojn de la komitato, se ili ne koncernas aliajn estraranojn;
   6. administras la arkivon.
4. La kasisto:
   zorgas pri ĉiuj kasaj kaj bilancaj aferoj, akurata librotenado kaj respekto de la budĝeto.
5. La redaktoro:
   prizorgas la eldonadon de la federacia organo en la kadro de la disponeblaj financaj rimedoj kaj konforme al la celoj de la Federacio.

1. Komitatlaboroj:
   1. La komitato kunvenas okaze de la federacia kongreso kaj eventuale inter du kongresoj en urĝaj kazoj.
   2. Dum la kongreso okazas:
      1. minimume unu nepublika komitatkunsido, en kiu rajtas partopreni estraranoj, komitatanoj kaj kromkomitatanoj, honoraj prezidantoj, honoraj membroj kaj ne pli ol unu observanto el ĉiu landa asocio. Honoraj membroj, honoraj prezidantoj kaj observantoj rajtas diskuti, sed ne voĉdoni;
      2. unu publika (kutime en du partoj) plenkunsido, en kiu ĉiuj IFEF-anoj rajtas diskuti, sed voĉdoni rajtas nur la komitatanoj, kromkomitatanoj aŭ anstataŭantoj;
      3. pliaj kunsidoj, kiuj antaŭe estas deklaritaj publikaj aŭ nepublikaj.
   3. La komitato krome funkcias skribe dum la tuta jaro pere de la ĉefkomitatano.
2. Estrarlaboroj:
   La estraro, krom en la kongreso, kunvenas almenaŭ dufoje jare.
3. Komisionlaboroj:
   La IFEF-komisionoj kunvenas plurfoje en kunsidoj kutime publikaj.

1. Proponojn por la tagordo de la sekvonta kongreso rajtas direkti al la ĉefkomitatano:
   1. estraranoj, komitatanoj kaj individuaj membroj;
   2. landaj asocioj kaj ties membroj pere de siaj komitatanoj.
2. La proponoj devas atingi la ĉefkomitatanon plej malfrue la 31an de decembro por esti pritraktataj en la komitatkunsidoj de la sekvonta kongreso.
3. En la publikaj kunsidoj ĉiuj membroj rajtas diskuti pri la punktoj de la tagordo.
4. Sub la punkto "Libera diskutado" ĉiuj membroj rajtas organizi debaton pri aferoj koncernantaj IFEF, kies konkludoj tamen ne devigas la Federacion je certa faro.

1. Por decidoj validas la plimulto de la "por" kaj de la "kontraŭ" esprimitaj voĉoj.
2. Decidojn en kunvenoj, en kiuj partoprenas en voĉdonado malpli ol la duono de la voĉdonrajtaj komitatanoj aŭ de la estraro, oni submetu al plia voĉdono en alia kunveno, en kiu sufiĉos la plimulto de la "por" kaj de la "kontraŭ" esprimitaj voĉoj.
3. Proponoj skribe senditaj de la ĉefkomitatano al la komitatanoj povas esti decidaj nur, kiam pli ol la duono de la voĉdonrajtaj komitatanoj partoprenas la voĉdonon.
4. Kaze de voĉegaleco oni konsideru proponon kiel malakceptitan.
5. Por ŝanĝi la Statuton - ne la Regularojn - aŭ por likvidi la Federacion necesas, ke du trionoj de ĉiuj voĉdonrajtaj komitatanoj partoprenas en voĉdonado kaj ke du trionoj de la esprimitaj voĉoj estas "por".
6. Pri personoj oni voĉdonu en kunsidoj sekrete kaj skribe.

1. Por kovri administrajn kaj parte vojaĝajn elspezojn de estraranoj kaj ĉefkomitatano, la komitato povas asigni certan sumon en la budĝeto. La komitatanoj ne ricevas kompensojn de la Federacio.
2. La komitatano "A" por UEA povas ricevi vojaĝkompenson, kiam li partoprenas en Universala Kongreso, sed nur laŭbezone kaj maksimume ĝis la valoro de 100 svisaj frankoj.

1. La financoj de la Federacio konsistas el:
   1. la havaĵo (kapitalo, fondusoj, oficejaj objektoj);
   2. regulaj enspezoj (kotizoj ktp);
   3. neregulaj enspezoj (subvencioj, donacoj, loterioj ktp).

La Federacio eldonas oficialan organon. Ĝi estas redaktata laŭ la fundamentaj principoj de IFEF esprimitaj en § 2 kaj § 3 kaj laŭ "Ĝeneralaj Gvidlinioj" fiksitaj de la estraro. Ĝi aperas minimume sesfoje jare.

1. Pri la arkivo respondecas la sekretario.

1. La komitato elektas en la kongreso tri revizorojn kaj unu vicrevizoron.
2. Taskoj de la revizoroj:
   1. ekzameni la financojn kaj la librotenadon;
   2. konstati kiom da komitatanoj la landaj asocioj rajtas delegi laŭ siaj kotizoj pagitaj ĝis la fino de la pasinta administra jaro.

1. Konfliktoj inter la membroj, landaj asocioj inter si aŭ kun la estraro aŭ komitato devas esti solvitaj interne de IFEF. Se konfliktantaj partioj ne sukcesas interkonsenti, konflikta komisiono prijuĝas kaj findecidas.
2. Tiu komisiono konsistas el tri personoj, po unu el la disputantaj partioj kaj tria, neŭtrala, ambaŭflanke akceptita, kiu prezidas. Se ne eblas interkonsento pri la tria persono, la estraro determinas la prezidanton.

1. Se necesas likvidi la Federacion, la komitato elektas komisionon, kiu ordigas la kurantajn aferojn kaj indikas la rimedojn por kovri eventualan deficiton.
2. Restanta havaĵo estu konservata dum dekkvin jaroj ĉe Esperanto- aŭ kultura organizo fiksita de la komisiono. Poste ĝi transiru al tiu organizo mem, se intertempe nova federacio ne fondiĝis.

Pri ĉiuj duboj kaj demandoj, kiuj ne estas traktitaj en tiuj ĉi Statuto kaj Regularoj, decidas la komitato aparte.

1. Tiuj ĉi tekstoj de Statuto kaj Regularoj estis formulitaj laŭ la rekomendoj de la statutrevizia komisiono kaj ŝanĝoproponoj de la komitato. La plenkunsido akceptis ilin dum la 41a IFEF-kongreso en Salou la 17.05.1989.
2. Tiuj ĉi Statuto kun ĝenerala Regularo kaj Aldonoj KR kaj TL validas ekde la 1a de januaro 1990 por ĉiuj IFEF-membroj. [Ili anstataŭas la Statuton/Regularojn de 01.01.1973].
3. Tiuj ĉi tekstoj enhavas ankaŭ la ŝanĝojn, kiujn akceptis la plenkunsido dum la 46a IFEF-kongreso en Krems a d Donau la 17.05.1994.